Ədliyyə naziri Fərid Əhmədov 22 iyulda Qusar şəhərindəki Heydər Əliyev Mərkəzində vətəndaşlarla görüş keçirib.
Ədliyyə Nazirliyindən verilən məlumata görə, görüşdən əvvəl nazir Ümummilli Lider Heydər Əliyevin abidəsini ziyarət edib.
Görüş zamanı Qusar, Quba, Xaçmaz, Şabran və Siyəzən rayonlarının sakinlərinin ədliyyə sahəsi ilə bağlı müraciətləri dinlənilib. Vətəndaşların qaldırdığı məsələlərin bir qismi yerində həll edilib. Əlavə araşdırma tələb edən digər müraciətlər isə qanunvericiliyin tələblərinə uyğun olaraq baxılması üçün müvafiq tapşırıqlar verilib.
Səfər çərçivəsində nazir həmçinin Qusar rayonunun icra və probasiya, qeydiyyat şöbələrinə və Qusar Rayon Məhkəməsinə baş çəkib, infrastrukturu və iş şəraitini yoxlayıb.
Qeyd edək ki, görüşlər mərkəzi icra hakimiyyəti orqanlarının və digər idarəetmə qurumlarının rəhbərləri tərəfindən şəhər və rayonlarda vətəndaşların qəbul cədvəlinə əsasən keçirilir.
