Şabran sakinləri və illərdir avtovağzal ətrafında fəaliyyət göstərən kiçik sahibkarlar ciddi narahatlıq keçirirlər. Təxminən iki ildir ki, avtovağzal şəxsi şəxs tərəfindən təmir edildikdən sonra ərazi tamamilə yüksək dəmir hasarla çəpərlənib. Bunun nəticəsində mağazalar avtovağzalın arxasında qalıb, turistlər və rayonumuza gələn qonaqlar onları görmür. On illərdir ailələrin dolanışıq yeri olan obyektlər indi müştərisiz və gəlirsiz vəziyyətdədir.
Sahibkarların sözlərinə görə, dəfələrlə müraciət edilməsinə baxmayaraq, problemə heç bir reaksiya verilmir. Avtovağzal rəhbərliyinə müraciət etmək mümkün deyil – nə izahat verilir, nə də dialoqa şərait yaradılır.
“Biz hasarın tamamilə götürülməsini tələb etmirik. Sadəcə belə hündürlüyə ehtiyac yoxdur. Maşınların əraziyə daxil olmaması üçün cəmi 40 sm-lik bordür kifayətdir. Niyə iki metr hündürlüyündə dəmir hasar? Avtobuslar kimdən qorunur?” – deyə sahibkarlar bildirirlər.
Hazırkı vəziyyət nəticəsində bir çox köhnə mağazalar artıq bağlanmalı olub. Qalan obyektlər isə son nəfəsini verir – gəlirlər kəskin şəkildə azalıb, insanlar ailələrini dolandıra bilmir.
Şabran kimi turistik potensialı olan bir şəhərdə belə bir problemin mövcudluğu yerli sakinləri dərindən narahat edir. Kiçik sahibkarlıq həm rayon iqtisadiyyatının bir hissəsidir, həm də insanların uzun illərdir qurduğu şəxsi əməyi, dolanışıq mənbəyidir.
Sakinlər və mağaza sahibləri aidiyyəti qurumlara səslənirlər:
Avtovağzal ətrafındakı hasarın yaratdığı sosial və iqtisadi fəsadları aradan qaldırmaq üçün tədbir görün.
Hər kəsin tələbi eynidir – biz sadəcə görünmək istəyirik, illərlə qurduğumuz zəhmətin boşa getməməsini istəyirik.
