Şabran İNFO xəbər verir ki, Daxili işlər naziri Quba rayonunda vətəndaş qəbulu və sıra baxışı keçirib.
Azərbaycan Respublikasının Prezidenti İlham Əliyevin göstərişlərinə və bölgələrdə vətəndaşların qəbulu cədvəlinə uyğun olaraq, daxili işlər naziri general-polkovnik Vilayət Eyvazov 17 və 18 iyul tarixlərində Quba Rayon Polis Şöbəsində vətəndaşlarla görüş keçirib.
Nazir Quba rayonuna səfəri çərçivəsində, ümummilli lider Heydər Əliyevin abidəsini ziyarət edərək onun xatirəsini ehtiramla yad edib.
Daha sonra Rayon Polis Şöbəsinin inzibati binasında Quba, Qusar, Xaçmaz, Şabran, Siyəzən və Xızı şəhər və rayonlarından gələn 296 vətəndaşın müraciətlərini dinləyən nazir, onların problemlərinin həlli üçün Nazirliyin müvafiq baş idarə və idarə rəislərinə tapşırıqlar verib. Müraciətlərin əksəriyyətinin yerində həlli üçün tədbirlər görülüb.
Səfər çərçivəsində general-polkovnik Vilayət Eyvazov, bölgə üzrə polis orqanlarında sıravi və kiçik rəis heyətinə xidmətə qəbulla bağlı sıra baxışı keçirib. Bu baxışda, 24 Vətən müharibəsi iştirakçısının da qatıldığı seçmə mərhələdə, xidmətə qəbulun şərtlərinə uyğun gələn 180 nəfər növbəti mərhələyə keçib.
