Quba Soyqırımı Memorial Kompleksində “Qədim Şabranın yaşayış mədəniyyəti” adlı sərgi açılıb.
AZƏRTAC-ın bölgə müxbiri xəbər verir ki, sərgidə “Çıraqqala-Şabran” Dövlət Tarix-Mədəniyyət Qoruğuna aid, qədim Şabran şəhərinin qalıqları arasından aşkar edilmiş onlarla maddi-mədəniyyət nümunələri, dəmir və dulusçuluq məhsulları nümayiş olunur.
Ziyarətçilərə maddi-mədəniyyət nümunələri ilə bərabər “Çıraqqala-Şabran” qoruğuna daxil olan abidələr və onların tarixləri barədə videoçarxlar tədim olunur.
Sərgi avqust-sentyabr ayları ərzində hər gün saat 10:00-dan 16:00-a kimi davam edəcək. Bununla yanaşı, kompleksdə arxeoloqların iştirakı ilə alban mədəniyyəti, şəhərsalma mədəniyyəti və bu kimi mövzular ətrafında ustad dərsləri təşkil olunacaq. Tədbirdə regionun tarixlə əlaqəli müəssisələrinin əməkdaşları, tələbə və gənclər, mədəniyyət işçilərinin iştirakı nəzərdə tutulub.
Sərgi Quba Soyqırımı Memorial Kompleksi və “Çıraqqala-Şabran” Dövlət Tarix-Mədəniyyət Qoruğunun birgə əməkdaşlığı çərçivəsində təşkil edilib.
Quba, 1 avqust, Elxan Yusifli, AZƏRTAC
